Bir muazzam pâdişâhsın ki, kulundur cümle şâh

Kurb-i "Ev Ednâ"ya vaz'oldu seninçin tahtgâh

Nüh felek, heft zemin ancak sana bir bârigâh

Emrine mahkûmdur âlem, her sözün vahy-i ilâh

Es-salât-u ves-selâm ey hâdi-yi râh-ı hüdâ

Küntü âsî yâ şefî-el müznibin irham lenâ

Hâk-i ravzandan güneş, nûru ederken iktibâs

Gerd-i pâyın kühl-i çeşm-i cân ederken mâhitâb

Yâ acep mi arşa fahreylerse Ravza'nda türâb

Cânına minnet idi, naleynin olsa âfitâb

Es-salât-u ves-selâm ey hâdi-yi râh-ı hüdâ

Küntü âsî yâ şefî-el müznibin irham lenâ

Kim ki nûr-i mihr-i zâtın mazhar-ı âgâhıdır

Ahter-i İslâm içinde, evc-i dinin mâhıdır

Kim gulâm oldu derinde kâinâtın şahıdır

Bir nigâh-ı iltifâtın âlemin felâhıdır

Es-salât-u ves-selâm ey hâdi-yi râh-ı hüdâ

Küntü âsî yâ şefî-el müznibin irham lenâ

Hangi hâke bassa pay-ı devletin ol Tûr olur

Cânib-i Hak'tan tecelliyyât ile pür nûr olur

Her nazarda, aynına vech-i Hudâ manzûr olur

Bu "Selâmî" hizmet-i na'tın ile mağfûr olur

Es-salât-u ves-selâm ey hâdi-yi râh-ı hüdâ

Küntü âsî yâ şefî-el müznibin irham lenâ

                                                            Selâmî